ముంబయి : బుల్లితెర హనుమంతుడు ఇకలేరు. బాలీవుడ్ నటుడు, మల్లయోధుడు దారాసింగ్ (84) కొద్దిరోజులుగా మృత్యువుతో పోరాడుతూ ఈరోజు ఉదయం కన్నుమూశారు. ఈనెల 7న గుండెపోటుతో ఆయన ముంబైలోని కోకిలాబెన్ ఆసుపత్రిలో చేరారు. మెదడు బాగా దెబ్బతిందని, కోలుకోవడం కష్టమని డాక్టర్లు తేల్చారు. కోమాలోకి వెళ్లే ప్రమాదముండడంతో కుటుంబసభ్యుల కోరిక మేరకు దారాను ఇంటికి పంపగా అక్కడే ఆయన తుదిశ్వాస విడిచారు.
పంజాబ్‌లో సిక్కుల కుటుంబంలో నవంబర్‌ 19, 1928లో దారాసింగ్ పుట్టారు. దేశ, విదేశాల్లో మల్లయోధుడిగా గుర్తింపుపొందారు. కామన్వెల్త్‌ దేశాల్లో పర్యటించిన దారా ఒరియంటల్ చాంపియన్ కింగ్‌ఖాన్‌, జార్జ్‌ గోర్డియెంకో, జాన్ డిసెల్వాతోపాటు పేరుగాంచిన ఎందరినో మట్టికరిపించారు.
1954లో ఇండియన్ ఛాంపియన్‌గా 1968లో వరల్డ్ ఛాంపియన్‌గా ఎదిగారు. 1960-70లలో ఎన్నో సినిమాల్లో ఆయన యాక్షన్‌ కింగ్‌గా నటించారు. డైరెక్టర్, ప్రొడ్యూసర్‌గా కూడా ఆయన మంచిపేరు తెచ్చుకున్నారు. ఇటు సీరియల్స్, యాడ్స్‌లో కూడా యాక్ట్ చేసిన దారా 2007లో వచ్చిన జబ్‌ వి మెట్‌లో చివరిసారిగా తెరపై మెరిశారు.
No comments:
Post a Comment